Адигея республикаси ички ишлар вазирлиги тўй кортежларини назорат қилувчи махсус бўлинма шакллантирди. Бу ҳақда Адигея ИИВ бошлиғи Александр Речицкий ТАСС ахборот агентлигига маълум қилди. Унинг айтишича, тўй полициясининг ташкил этилиши тўй тадбирида бошқариб бўлмайдиган хурсандчилик қилаётганларни тинчлантиришга ёрдам беради. 

Таркибига 40 нафар полициячи, жумладан патруль-пост хизмати, ГИБДД, маҳаллий нозирлар ва суриштирув органлари ходимлари кирган бўлинма аввалдан маълум қилинган тўй кортежларини назорат қилади. Полиция нарядлари келин-куёвлар анъанавий тарзда ташриф буюрадиган майдонлар, боғлар ва жанговор шон-шуҳрат жойларида қўйилади. Бундан ташқари, келин-куёвларнинг ҳаракатланиши аэростат ёрдамида ҳаводан ҳам кузатиб борилади. Вазир полициячилар ўзларини хушмуомала тутиб, кортежларни тақиб қилмасликларига ваъда берди.

Бундай полиция бўлинмасини тузиш фикри тўйдаги меҳмонлар томонидан отишмалар уюштирилаётгани ҳолатларининг кўпайиб кетгани сабабли юзага келди. Жорий йилнинг бошидан тўй кортежлари томонидан отишмалар амалга оширилган иккита ҳолат қайд қилинди. Бундай ҳолатлардан охиргиси Майкоп шаҳрида августда рўй берди. 27 ёшли “мерган” қўлга олиниб, суд унга 50 минг жарима тўлаш мажбуриятини қўйди ва қуролини мусодара қилди.