Германиянинг Volkswagen автоконцерни Россиянинг Калуга шаҳрида двигатель ишлаб чиқарувчи заводни ишга туширди. Бу ҳақда Интерфакс агентлиги хабар бермоқда.

Заводнинг очилиши маросимида Россия бош вазири Дмитрий Медведев, вилоят ҳокими Анатолий Артамонов, автоконцерннинг Россия офиси бош директори Маркус Озегович, шунингдек, Чехия ва Германия элчилари иштирок этди.
Ишлаб чиқаришни ташкил этишга 250 млн доллар инвестиция киритилди. Корхона йилига 150 минг мотор ишлаб чиқариш салоҳиятига эга.

У Volkswagen Polo ва Skoda Rapid моделлари учун 1.6 л ли моторлар ишлаб чиқаради. Локализация ҳажми 30 фоизни ташкил қилади.
Двигателлар концерннинг Калугадаги заводига етказиб берилади. Ушбу завод Нижний Новгороддаги ГАЗ гуруҳи корхонаси негизида ташкил этилган эди.