Ўзбекистон ва Жанубий Корея янги клиника қурилиши борасида музокаралар олиб бормоқда. Бу ҳақда Кореянинг Ўзбекистондаги элчиси Ли Ук-Хён маълум қилди.
Унинг айтишича, ушбу лойиҳа соғлиқни сақлаш соҳасидаги ҳамкорлик доирасида амалга оширилади.

“Айни пайтда шифокорларнинг малакасини ошириш ва эпидемик касалликларга қарши кураш сифатини яхшилаш бўйича қўшма лойиҳалар амалга оширилмоқда. Бундан ташқари, Тошкентда болалар учун шифохона қурилмоқда, катталар учун клиника қурилиш борасида музокаралар кетмоқда”, - деди у “Жаҳон” агентлигига берган интервьюсида.
Жанубий Кореянинг Ўзбекистондаги элчиси Ли Ук-Хённинг айтишича, икки давлатнинг иқтисодий муносабатлари самарали ривожланиб бормоқда. Шунга қарамай, унинг фикрича, Устюртдаги мисол йирик лойиҳалар олиб бориш икки мамлакат учун ҳам манфаатли бўлади.

“Бу соҳадаги муваффақиятли ҳамкорлигимизнинг ёрқин мисоли Сургил кони негизида Устюрт газ-кимё комплексининг қурилиши бўлди, - деди у. – Муваффақиятни мустаҳкамлаш учун бу каби йирик лойиҳалар устида ишлашни давом этишимиз лозим”.