Эстония ва Россия чегараси ҳақидаги масала ҳал бўлмагунга қадар Эстония ҳукумати икки давлат ўртасида тўсиқ қуришни бошламайди, деб айтди Эстония ташқи ишлар вазири Марина Кальюранд. Бу ҳақда РИА «Новости» хабар бермоқда.

“Биз бугун ҳеч қандай девор қурмаймиз, биз бугун фақат чегарани тозаламоқдамиз, тегишли белгиларни қўймоқдамиз. Бироқ биз чегара ҳақида келишув тузганимизда ёки тузмаганимизда бу чегара қандай қўриқланиши маълум бўлади. Бугун биз у ерда девор қурмаймиз”, деб айтди Кальюранд.

Аввалроқ Эстония полиция департаменти ва чегарани қўриқлаш хизматининг икки давлат ўртасидаги қуруқликдаги қисмида 2,5 метр баландликда девор қуриши ҳақида ахборот берилган эди.