Истиқлол йиллари республикамизда диний соҳада юритилаётган оқилона сиёсат асосида ҳар бир шахснинг виждон ва эътиқод эркинлиги, диний қарашларидан қатъи назар тенгҳуқуқлилиги таъминланиб, фуқароларимизнинг эмин-эркин диний эътиқодларини амалга оширишга кенг шароитлар яратилди.
Фуқаролар эътиқодларидан келиб чиққан ҳолда диний ташкилотларга бирлашиб, мустақил ҳуқуқий шахс сифатида фаолият юритиши, диний мутахассислар тайёрлашлари ва адабиётларни нашр этишлари, диний байрам ва маросимларини ўтказишлари, муқаддас жойларга зиёратлар ташкил этишлари кафолатланди. Жумладан, ҳар йили 11000 дан зиёд зиёратчиларимиз ҳаж ва умра амалларини адо этмоқдалар.


Куни кеча Ўзбекистондан ҳаж сафарига чиққан зиёратчиларимизнинг дастлабки гуруҳлари Саудия Арабистонининг Мадина шаҳрига етиб келди деб хабар бермоқда religions.uz. Бўлажак ҳожиларимиз Масжиди Набавийнинг ёнгинадаги “Вусулул Муҳаммадия” ва “Жавҳратул Асима” меҳмонхонасига жойлаштирилди. Зиёратчиларни ишчи гуруҳи вакиллари кутиб олиб, улар учун тайёрланган хоналарга жойлаштирдилар. Меҳмонхоналарда овқатланиш ва дам олиш учун зарур шароитлар муҳайё қилинган бўлиб, бўлажак ҳожиларнинг соғликлари шифокорларнинг доимий назоратлари остига олинган. Меҳмонхонанинг ўзида тиббиёт маркази ҳамда кундузги муолажа ва профилактика хоналари ташкил этилган. Ўз навбатида, Ўзбекистондан келган тажрибали ошпазлар зиёратчиларимиз учун миллий таомлар тайёрламоқдалар. Зиёратчиларимиз гуруҳ раҳбарлари етакчилигида Масжиди Набавийга бориб, Пайғамбар (с.а.в.)нинг қабрларини зиёрат этиб, ибодатларини бошлаб юбордилар.
Шу кунларда юртдошларимиз учун саҳобалар, жумладан, Муҳаммад (с.а.в.) амакилари Ҳамза (р.а.) қўним топган Ухуд тоғи, “Икки қиблали” масжид, “Қубо” масжиди каби Мадинанинг мўътабар қадамжоларига зиёратлар ташкил этила бошланди. Зиёратчиларимиз ислом динининг бешта арконидан бири бўлган улуғ бир ибодатни адо этишга ҳозирлик кўрмоқдалар. Ватандошларимиз мана шундай дориламон кунларга етишишларига имкон берган истиқлолимиз мустаҳкам, юртимиз тинч ва осойишта, халқимиз эса фаровон бўлишини тилаб, юртдошлари, фарзандлари ва яқинлари ҳақларига дуолар қилмоқдалар.
Фуқароларимизнинг ҳаж сафарлари муваффақиятли давом этмоқда.