Мексика ҳукумати 2014 йилнинг сентябрь ойида 43 нафар талабанинг бедарак йўқолгани юзасидан янги тергов ишини олиб боради. Бу ҳақда Reuters агентлиги мамлакат бош прокурори Арели Гомес баёнотига асосланиб хабар берди.

Инсон ҳуқуқлари бўйича Америка давлатлари комиссияси экспертларидан иборат халқаро мустақил гуруҳ бунча миқдордаги жасадларни ёқиб юбориш имконсиз, деган хулосага келган. Комиссия маълумотларга кўра, бунинг учун жиноятчиларга 30 тонна ёғоч, 13 тонна автомобиль шиналари ва сезиларли даражада кўп вақт керак бўлади.

Гомеснинг маълумотига кўра, янги тергов-суриштирув ишлари олий тоифадаги суд-тиббиёт мутахассислари жалб этилган ҳолда олиб борилади. Бош прокурорнинг таъкидлашича, ҳукумат тергов ишларини давом эттириш учун экспертларнинг мамлакатда қолиш муддатларини узайтиришга ҳаракат қилади.

Эслатиб ўтамиз, 2014 йилнинг сентябрь ойида талабалар намойишига полиция ва босқинчилар тўдалари ҳужум қилганида 43 нафар талаба изсиз ғойиб бўлган эди. Айрим тахминларга кўра, улар ўлдирилиб, жасадлари Мексиканинг Кокола туманида ёқиб юборилган.