Қашқадарёлик фирибгар икки кишининг машинасини сотиб юбориб, пулларини ишлатиб юборганликда айбланди. Бу ҳақда “Ҳуқуқ” газетаси хабар бермоқда.

Асли қашқадарёлик бўлган 30 ёшли Содиқ Пирматов фирибгарлик учун муқаддам судланган ва мажбурий меҳнатга тортилган эди. Жазони ўтаб бўлгач, у Тошкентга келиб, машина бозорида “фаолият” бошлади. Дастлаб янги орттирган танишларидан бирининг Lacetti машинасини 18 минг долларга, яна бир шахснинг Nexia автомобилини 38 млн сўмга сотиб юбориб, бу пулларни ишлатиб юборди. Машина эгаларига эса уловларни ўзи сотиб олганини ва бир йил давомида пулларни тўлаб боришини айтди.
Машина эгалари пул қайтарилишини бир йил кутишди, натижа бўлмагач, милицияга мурожаат қилишди.

Кўрилган чоралар натижасида фирибгар жазога тортилиб, фуқароларга етказилган моддий зарар ундириб берилди.