Курдистон ишчи партияси жангарилари Туркиянинг жануби-шарқида зирҳли техника колоннасига уюштирган ҳужумлари оқибатида камида 15 нафар турк аскарини ўлдирганларини маълум қилишди, деб хабар бермоқда Reuters ахборот агентлиги.

Қурбонлар сони ҳозирча Туркия ҳукумати томонидан расман тасдиқланмади, бироқ мамлакат президенти Ражаб Тойиб Эрдўған телевизион мурожаатида ҳужум ҳақиқатда бўлганини тасдиқлади. Ҳужум Туркиянинг Эрон ва Ироқ билан чегараси яқинидаги Хаккари вилоятида содир этилган.

Аввалроқ Туркиянинг Диёрбакир шаҳрида номаълумлар томонидан гранатомётдан очилган отишмада 2 нафар полиция ходими ҳалок бўлгани ва яна 3 нафари яралангани маълум қилинган эди.