Индонезия энергетика вазири Судирман Саиднинг маълум қилишича, мамлакат шу йилнинг декабрида ОПЕКка аъзо бўлади. Бу ҳақда Jakarta Globe хабар берган.

"Биз ОПЕК бош котибиятидан расмий тасдиқнома олдик. Котибият аъзолари Индонезия қайтадан ташкилотнинг тўлақонли аъзоси бўлишига розилик билдиришган", дейди вазир.

Индонезия Жанубий-Шарқий Осиёдаги энг йирик нефть етказиб берувчилардан бири ҳисобланади.

Маълумот учун, Индонезия 2009 йилнинг 1 январида ОПЕКнинг аъзолари сафидан чиқарилганди. Шундан сўнг, бу мамлакат ташкилотда кузатувчи мақомида қолганди.

Индонезия ҳукумати нефть қазиб олишни кўпайтиришни режалаштирмоқда. Айни пайтда мамлакат кунига 830 минг баррель нефть ишлаб чиқаради.