2 нафар афғонистонлик велосипедчи тинчликни қўллаб-қувватлаш мақсадида велотурне бошлашди. Айтилишича, спортчилар 3та қитъа бўйлаб саёҳат қилишади.
Афғон ҳукумати тинчлик элчиси Нодиршоҳ Нангархорий ва унинг ўғли турнени июль ойида Истанбулдан бошлашгани айтилмоқда.

“Афғон халқи тинчликни истайди, биз урушдан чарчадик, - деди у Прагада Озод Европа радиосига берган интервьюсида. – Мен буни йўлимда учрайдиган инсонларга етказишдан умид қилмоқдаман”.
Нангархорий Германия, Скандинавия ва Буюк Британияга велосипедда бориб, сўнг Шимолий Америкага учиб ўтмоқчи. Шимолий Америка мамлакатларида бўлгач, ота-ўғил велосипедчилар Австралияда бўлади.

Афғонистон миллий олимпия қўмитаси спортчиларни тегишли асбоб-ускуна ва воситалар билан таъминлади. ТИВ эса визаларни расмийлаштириш ва барча харажатларни ўз зиммасига олди.