Америкалик боксчи Флойд Мэйуэзернинг профессионал боксдаги ҳал қилувчи сўнгги, Андре Бертога қарши жангига қизиқиш у қадар юқори бўлмаяпти, деб ёзади ESPN нашри. Бокс жанги бошланишига 4 кун қолганида жанг учун чиқарилган 2 минг 100дан ортиқ чипталар сотилмай турибди.

66,68 кг.гача вазн тоифасининг Бутунжаҳон боксчилар ассоциацияси (WBA) ва Бутунжаҳон боксчилар кенгаши (WBC) йўналишлари бўйича жаҳон чемпионлиги учун кечадиган мазкур бокс жанги 12 сентябрь куни Лас-Вегасдаги (Невада штати) MGM Grand спорт аренасида бўлиб ўтади.

Мэйуэзер ва Пакьяо ўртасидаги жанг чиптасига нисбатан анчагина арзон бўлишига қарамай мазкур бокс учрашувига бўлган қизиқиш унчалик юқори бўлмаяпти. Аср жанги таърифини олган жанг учун ўртача чипта нархи 5095 долларни ташкил қилган бўлса, бўлажак жанг учун чипталарнинг ўртача баҳоси саккиз баравар камроқ – 799 доллар (125 доллардан 1500 долларгача). Сешанба куни Мэйуэзер ва Берто жанги учун чиқарилган 1000 доллардан қимматроқ бор-йўғи 25 дона чипта сотилган.

Мэйуэзер-Пакьяо учрашуви боис MGM Grand меҳмонхона хизмати мижозлари тўрт баравар ошиб кетган бўлса, ҳозирда мазкур меҳмонхонанинг 1000 доллардан қимматроқ номерини икки кун ва ундан ортиқроқ муддатга банд қилган мижозларга бонус сифатида Мэйуэзер – Берто жангига қўшимча иккита чипта тақдим этишмоқда.

Мутахассислар бунинг сабабини Мэйуэзернинг рақиби унчалик юқори даражада эмаслиги билан изоҳлашмоқда.

38 ёшли Мэйуэзер шу кунгача 48 учрашувнинг барчасида ғалаба (26 нокаут билан) қозонган бўлса, 32 ёшли Берто - 30 ғалаба (23 нокаут), 3 мағлубиятни қайд қилган.