Мексика шифохоналаридан бирида тасвирга олиниб, интернетга жойланган видео катта можароларга сабаб бўлди. Роликда тиббиёт маскани ходимларидан бирининг овқат тайёрлашга мўлжалланган қозонда чўмилгани акс этган.

Ҳодиса Пуэбла шаҳридаги травмотолия ва ортопедия госпиталида содир бўлган, дея хабар бермоқда Mirror нашри.

Видеода оқ халат кийиб олган госпитал ходими қозонга ўтиргани, сўнгра унинг устидан ҳамкасби чўмич билан сув қуйгани тасвирланган. Шундан сўнг “ювинган” санитар қўлига катта ёғоч эшкакни олиб, гўёки қайиқда сузаётгандек ҳаракат қилади. Бу ҳолни кўрган ҳамкасблар кулишади.

Британиялик журналистлар маълумотига кўра, бир кун ичида видео 87 минг маротаба кўрилган. Мексика Соғлиқни сақлаш вазирлиги вакиллари видеороликдан даҳшатга тушиб, айбдорларни қидиришни бошлагани хабар қилинди.

Бундай кўринишдаги қоидабузарликлар фақатгина Мексикада содир бўлмаган. Ўтган йили Россиянинг Омск шаҳрида пишлоқ ишлаб чиқарувчи завод ходимларининг пишлоқ ишлаб чиқариш учун мўлжалланган сутда чўмилгани тасвирланган суратлар катта шов-шувларга сабаб бўлган эди.