Кеча Тошкентда “2015-2019 йилларда иқтисодиётни янада ислоҳ қилиш, структур қайта тузиш ва диверсификациялаш дастурини реализация қилишда ҳуқуқни муҳофаза қилувчи органлар роли ва масъулиятини ошириш тўғрисида” мавзуидаги семинар бўлиб ўтди.

Тадбирда республиканинг турли бурчакларидан ташриф буюрган 300дан ортиқ тадбиркорлар, саноат корхоналари раҳбарлари, кичик бизнес ва хусусий тадбиркорлик субъектлари, фермер хўжаликлари эгалари иштирок этди.
Тадбир президентнинг “Хусусий мулкни, кичик бизнес ва хусусий тадбиркорликни ишончли ҳимоя қилиш, уларнинг ривожланишига қўйилаётган тўсиқларни бартараф этиш тўғрисида”ги фармонини амалга ошириш механизмлари муҳокамасига бағишланди.

Иштирокчилар тадбир давомида иқтисодий ислоҳотларнинг 2015-2019 йилларда иқтисодиётни янада ислоҳ қилиш, структур қайта тузиш ва диверсификациялаш дастури билан боғлиқ янги босқичини муҳокама қилишди. Бу жараёнда ҳуқуқни муҳофаза қилувчи органлар жойларда назорат ишларини юритиб, дастурда кўзда тутилган чора-тадбирларнинг сўзсиз амалга оширишини таъминлаши лозимлиги таъкидлаб ўтилди.
Конференцияда Ўзбекистон бош вазирининг биринчи ўринбосари Рустам Азимов чиқиш қилди.
Шунингдек, Ўзбекистон бош прокурори Ихтиёр Абдуллаев тадбир доирасида чиқиш қилиб, тадбиркорлар ҳуқуқларини ҳимоя қилиш борасида прокуратура олиб бораётган ишлар хусусида гапириб ўтди. Унинг таъкидлашича, прокуратура ҳузурида ишонч телефонлари ташкил этилган бўлиб, у орқали тадбиркорларга зарурий ҳуқуқий ва амалий ёрдам кўрсатилмоқда.

“Бош прокуратурада 1007 рақамида ишонч телефони иши таъминланган. Бу телефон орқали мурожаат қилган тадбиркорларнинг ҳеч қандай мурожаати жавобсиз қолмайди”, - таъкидлади Абдуллаев.
Бундан ташқари, у идора олдида турган ушбу йўналишдаги кейинги ишларга қисқача тўхталди.

Муаллиф: Элдор Асанов