Россия Сурияга ўқ отар қуроллар, гранатомёт ва БТРлар етказиб беради, дея ёзмоқда “Коммерсантъ” нашри хорижий мамлакатлар билан ҳарбий-техника ҳамкорлик соҳасидаги ахборот манбасига асосланган ҳолда.

Ахборот манбасининг ёзишича, “айни пайтда Сурияга ўқ отар қуроллар, гранатомётлар, БТР-82А бронетранспортёрлари, “Урал” ҳарбий юк машиналари ва Сурия армияси шахсий таркибининг муайян жойдаги ҳарбий ҳаракатлари ва уларнинг кўчирилиши учун зарур бўлган бошқа турдаги қуролларнинг бир неча партиясини етказиб бериш ишлари олиб борилмоқда ёки тугалланиш арафасида”.

Қайд этилишича, қуролларни етказиб бериш ишлари халқаро қонунчиликка мос равишда, барча расмиятчиликларга амал қилинган, Россия ва Сурия ҳукуматлари ўртасида тузилган шартномалар доирасида олиб борилмоқда.

Хабарда таъкидланишича, мазкур келишувлар учун маблағнинг бир қисми Дамашқ томонидан тўланган, бироқ Москва ва Исроил ҳукумати ўртасида ўтказилган маслаҳатлашувлардан сўнг етказиб бермасликка қарор қилинган С-300ПМУ-2 ҳаво ҳужумидан мудофаа қуролининг етказилиши учун бўнак сифатида тақдим этилган маблағлар эвазига амалга оширилмоқда.