Россиянинг Тула вилоятидаги корхоналардан бирида 1990-йиллар тажрибасига қайтилди. Бу йилларда иш ҳақлари бўйича қарздорлик ишлаб чиқариладиган маҳсулот билан ҳисоб-китоб қилинган. “Тульские новости” порталининг маълум қилишича, “Советский завод строительных материалов” МЧЖ ишчиларига иш ҳақи бўйича қарздорликнинг бир қисмини ғишт маҳсулоти билан тўлашга қарор қилинди.

Корхонада 2013 йилдан бери иш ҳақи бўйича қарздорлик тўпланиб қолган. Айни пайтда завод 186 ишчисига 4 млн рубль тўлаши керак.

Шекино маъмурияти бошлиғи Олег Федосов ушбу корхонанинг қарзлари бўйича вазият 2013 йилдан бери муҳокама қилиб келинганини маълум қилди. Иш ҳақи бўйича қарздорликни узиш бўйича бошқармалараро комиссия йиғилишида 900 минг сўмлик қарз заводда ишлаб чиқариладиган маҳсулот – ғишт кўринишида берилгани маълум қилинди.
Айни пайтда заводда ташқи кузатув тартиби жорий қилинди. Заводнинг вақтинчалик бошқарувчиси Владимир Овчинниковнинг айтишича, қарзлар кейинги йилнинг ўрталарига келиб узилади.