Британия ҳукумати 2015 йилнинг 31 мартидан 12 ой ичида терроризмга алоқадор жиноятларда айблаб қўлга олинганлар сони рекорд даражага етганини маълум қилди. 18-20 ёшли қўлга олинганлар сони ўтган 2014 йилга нисбатан икки баробарга ошди.

Британия Ички ишлар вазирлигининг пайшанба, 10 сентябрь куни тарқатган статистик маълумотига кўра, полиция терроризмда айблаб 299 кишини қўлга олган бўлиб, бу ўтган йилнинг шу даврига нисбатан 31 фоиз кўп демакдир.

ИИВнинг қайд этишича, эълон қилинган сўнгги маълумотлар 2001 йилдан буён олиб борилаётган шу турдаги статистик жамланмалари ичида рекорд натижа ҳисобланади. Аввалги рекорд даражадаги қўлга олинганлар сони 2005 йилда кузатилган бўлиб, ўша йили полиция 284 кишининг қўлига кишан таққан эди.

“Шу билан бирга, 2014/15 йилги ҳисобот даврида терроризмда гумон қилинганлар ичида Британия фуқаролари ва иккинчи фуқароликка эга шахслар сони ҳам ортган. Шунингдек, террористик фаолиятда гумон қилиниб, 35 аёл ҳам ҳибсга олинган бўлиб, бу ҳам сўнгги беш йил ичидаги рекорд натижа ҳисобланади. 18-20 ёшли ҳибсга олинган сони эса ўтган ҳисобот даврига нисбатан икки баробарга кўпайган”, – дея хабар қилди вазирлик.