Исроил мудофаа вазири Моше Яалон охирги бир неча кун давомида Россия қўшинлари Сурияга “ИШИД” террорчилик гуруҳи билан курашгани келганларини маълум қилди. Бу ҳақда Associated Press ахборот агентлиги маълум қилди. 

Яалон россиялик ҳарбийларнинг Сурияга келишидан асосий мақсад Латакия шаҳри яқинида авиабаза қуришдан иборатлигини айтди. Бу авиабазадаги вертолёт ва самолётлардан Сурия армияси террорчиларга қарши курашда фойдаланиши мумкин.
“Тушунишимизча, бу босқичда гап чекланган кучлар – маслаҳатчилар, хавфсизлик жамоаси ҳамда самолёт ва ҳарбий вертолётларни фойдаланишга тайёрлаш бўйича мустахассислар ҳақида кетмоқда”, деб таъкидлаб ўтди Яалон.

Яалон Россия биринчи навбатда Суриядаги ўз манфаатларини ҳимоя қилаётганини, чунки бу давлат ҳудудида унинг ҳарбий-денгиз базаси жойлашганлигини қўшимча қилиб ўтди. Бироқ шу билан бирга исроиллик вазир бу маълумотни қаердан олганига ойдинлик киритмади.

Аввалроқ Россия Ташқи ишлар вазирлиги расмий вакили Мария Захарова Сурия Россия қурол-аслаҳасидан фақатгина террорчиларга қарши фойдаланишга кафолат беришига ишонтириб ўтди.