Норвегиялик чегарачилар россиялик таксичиларни агар улар чегара орқали суриялик муҳожирларни ўтказишни бас қилмасалар, уларга мамлакатга кириш ёпиб қўйилишидан огоҳлантирди. Бу ҳақда ТАСС ахборот агентлиги Мурманск вилоятида йўловчиларни ташиш билан шуғулланувчи компаниялардан биридаги манбага иқтибос келтирган ҳолда маълум қилди.

“Ҳозирча огоҳлантириш норасмий тусга эга, бироқ таксичилар ҳозирданоқ сурияликларни ташишни рад этмоқдалар”, деб айтди манба.

Қайд этилишича, Мурманск транспорт компаниялари бир неча ойдан бери суриялик қочқинларни Норвегияга ташишга буюртма олмоқдалар.

ОАВларнинг хабар беришича, сурияликлар Мурманскга асосан Москвадан учиб келиб, машинада Норвегия назорат-ўтказиш пунктигача етиб олиб, у ерда сиёсий бошпана сўрамоқдалар.

Аввалроқ Россия Федерал миграцион хизмати раҳбари Николай Смородиннинг маълум қилишича, суриялик 2 минг муҳожир Сурияда қуролли можаро бошлангандан кейин Россияда вақтинчалик бошпана олган.