Дания бугун, 10 сентябрь куни ноқонуний муҳожирлар туфайли тўхтатиб қўйилган Германия билан темир йўл алоқасини қайтадан тиклади. Бу ҳақда “Бельга” агентлиги маълум қилди.

Поездлар ҳаракати скандинавия давлати жанубидаги Падборг шаҳридан бошланди. Айни пайтда, Дания ва Германия паромлари кечиб ўтувчи терминал жойлашган Редбю-Путтгарден йўналиши бўйлаб темир йўл алоқаси тиклангани йўқ, дея маълум қилди Дания темир йўллари (DSB).

Иш кунлари Гамбург ва Копенгаген йўналишида ҳар куни иккала йўналишда 5 поезд, Фленсбург- Падборг йўналишида эса энг камида ўн поезд таркиби ҳаракати йўлга қўйилган эди.

Дания ҳуқуқни муҳофаза қилиш органларининг темир йўл ҳаракатини тўхтатиш тўғрисидаги қарори сўнгги кунларда Германиядан Дания ҳудуди орқали кўп миқдордаги ноқонуний муҳожирларнинг Швецияга ўтиб олиб, ўша ерда бошпана топишга уриниши кучайгани сабаб қабул қилинди. Шу муносабат билан чегараларда паспорт назорати кучайтирилди.

Чоршанба, 9 сентябрь куни чегарачилар Редбюда темир йўл таркибида 340 нафар қочқинни қўлга олган эди. Улар датлар уларга бошпана бермасдан, ортга — Германияга қайтариб юборишларидан чўчиб вагонларни тарк этишни исташмаган. Полиция билан бўлиб ўтган музокаралардан сўнг минглаб муҳожирлар Дания ҳудудида қолишга рози бўлган.