Россиянинг Красноярск шаҳри мэри Адҳам Оқбулатов Ўзбекистоннинг Россиядаги фавқулодда ва мухтор элчиси Акмал Камолов билан учрашди. Красноярскда Камолов бошчилигидаги Ўзбекистон делегацияси ишчи сафар билан бўлиб турибди.

Оқбулатов Камоловга Красноярскга билдирган қизиқиши учун миннатдорчилик билдирди ва охирги йилларда шаҳарда Россия-Ўзбекистон ҳамкорлиги фаол ривожланаётганини таъкидлаб ўтди.

“Красноярск кўп миллатли шаҳар. Бу ерда катта ўзбек диаспораси яшайди ва улар билан бизни илиқ алоқалар бирлаштиради. Сизнинг ташрифингиз савдо-иқтисодий ҳамкорликни ривожлантириш, красноярсклик ва ўзбекистонлик тадбиркорлар ўртасида ҳамкорлик алоқаларини кучайтиришга туртки бўлади, деб умид билдираман. Бизнинг шаҳримиз халқаро спорт анжумани – 2019 йилги Универсиада ўйинларини ўтказишга тайёргарлик кўрмоқда ва бизнинг ҳамкорлигимиз ёшлар сиёсати масалаларида ҳам самарали ривожланади, деб ишонч билдираман”, деб айтди Оқбулатов.

Ўзбекистон элчиси Акмал Камолов Ўзбекистондаги ишларнинг замонавий ҳолати, унинг ижтимоий-иқтисодий ривожланиши ҳақида маълумот берди ҳамда красноярсклик тадбиркорлар Ўзбекистондаги қатор соҳаларга қизиқиш билдиришига ишонч билдириб қолди.
Красноярск ва Ўзбекистон ўртасида ҳамкорлик алоқалари нафақат иқтисодиёт ва савдо соҳасида мустаҳкамланмоқда. Шаҳардаги ўзбек диаспораси вакиллари бу ерда турли миллий байрамлар ўтказиб келадилар. Булардан “Қовун сайли” Красноярск аҳолисига айниқса хуш келган. Красноярскга мунтазам равишда Ўзбекистоннинг ижодий жамоалари ташриф буюрадилар. 2014 йилда Ўзбекистоннинг El Merosi тарихий кийим-кечак театри ва бир қатор мусиқачилар Осиё-Тинч океани минтақаси давлатларининг IV Красноярск халқаро мусиқа фестивалида иштирок этганлар.