“Норманд тўртлиги” мамлакатлари етакчилари Россия президенти Владимир Путин, Германия канцлери Ангела Меркель, Франция раҳбари Франсуа Олланд ва Украина президенти Пётр Порошенко 2 октябрь куни Париж шаҳрида учрашиб олишга келишишди, дея хабар бермоқда Кремь матбуот хизмати.

Матбуот хизмати маълумотларига кўра, 9 сентябрь куни тунда “Норманд тўртлиги” мамлакатлари етакчилари телефон суҳбатларини ўтказиб, Украина жануби-шарқидаги инқирозни бартараф этиш масаласини муҳокама қилишди. “Етакчилар Украина жануби-шарқида ўқ отишни тўхтатишни қўллаб-қувватлашди. Навбатдаги вазифа барча тўқнашув чизиқларидан бронетехника, 120 миллиметргача бўлган миномётлар, 100 миллиметргача артиллерия қуролларини олиб кетишга эришишдан иборат”, – дейилади хабарда.

Россия томонининг фикрича, асосий эътиборни Минск келишувида белгиланган сиёсий ҳолатни юзага чиқаришга қаратиб, Украинада конституцион ислоҳотларни олиб бориш, Донбасс ҳудудига алоҳида мақом бериш, шунингдек, маҳаллий сайловларни ўтказиш ҳамда амнистия тўғрисидаги қонунни қабул қилиш лозим. Суҳбат жараёнида Украинага Россия газини етказиб бериш масаласи ҳам кўтарилган.

“Норманд тўртлиги” давлатлари етакчилари, шунингдек, 12 сентябрь куни Берлинда бўлиб ўтадиган мамлакатлар ташқи ишлар вазирлари учрашувига ҳам тўхталиб, давлат расмий вакилларига турли йўналишларда ишларни давом эттириш ва аниқ таклифларни тайёрлаш вазифасини топширишга келишиб олинди.