АҚШ полицияси Флорида штатида яшовчи 20 ёшли Жош Голдбергни Миссури штати Канзас-Сити шаҳрида теракт тайёрлаётганликда гумон қилиб қўлга олди. Бу ҳақда Америка адлия департаменти расмий сайтида маълум қилинди.

Йигитча теракт ташкил қилиш мақсадида тез қайнатар қозон (кастрюлька)да шикаст етказувчи моддалар ёрдамида портловчи қурилма тайёрлашнинг аниқ қўлланмасини сўраб ўзи билмаган ҳолда Федерал қидирув бюроси агенти билан боғланган. Голдберг терактни 2001 йилнинг 11 сентябрь кунидаги терактларнинг 14 йиллигига бағишлаб ташкил этилувчи хотира масросими бўлиб ўтадиган жой яқинида амалга оширишни режалаштирган.

Қайд этилишича, Голдберг ИШИД гуруҳига мойил бўлиб, ижтимоий тармоқларда ҳам бу ҳақда фикр билдирган. Айбини тан олган тақдирда, у 20 йиллик қамоқ жазосига ҳукм қилиниши мумкин.

Эслатиб ўтамиз, бундан роппа-роса 14 йил муқаддам — 2001 йил 11 сентябрь куни маҳаллий вақт билан соат 08:46 да экстремистлар томонидан олиб қочилган самолётлардан бири Жаҳон савдо марказининг Шимолий минорасига бориб урилган эди. Шу куни АҚШ мудофаа вазирлигининг қароргоҳи ҳам террорчиларнинг нишонларидан бирига айланганди.
Қўпорувчилик ҳаракатлари натижасида 2974 киши (террорчилардан ташқари) ҳалок бўлган, 24 нафари бедарак йўқолган. Ушбу фожиада АҚШ ва яна 91 та мамлакат фуқаролари ҳалок бўлган.