Туркманистон пойтахти Ашхободда Ўзбекистон Республикаси мустақиллигининг 24 йиллигини нишонлаш муносабати билан расмий тадбир бўлиб ўтди. Тадбирга Туркманистон сиёсий ва ишбилармон доираларининг вакиллари, ижодкорлар, дипломатик корпус ва халқаро ташкилотлар раҳбарлари ва вакиллари, маҳаллий ва хорижий ОАВлар вакиллари таклиф этилдилар.

Меҳмонлар Ўзбекистонда мустақиллик йилларида амалга оширилган катта миқёсдаги ислоҳотлар, жамоатчилик ва давлат қурилишида, бозор иқтисодиётининг ривожланиши ва ижтимоий соҳаларда эришилган ютуқлар билан танишдилар.

Йиғилганлар олдида Туркманистон савдо вазири Б.Абаев нутқ сўзлади. Абаев Туркманистон президенти номидан ўзбек халқини давлат байрами билан табриклади, сиёсий, ижтимоий-иқтисодий ва маданий-гуманитар соҳалардаги ислоҳотларни амалга оширишда муваффақиятлар тилаб қолди.

Абаев ўзбек-туркман ҳамкорлигининг ривожланиши ҳақида гапириб, икки халқ маданияти, тили ва анъаналарининг тарихий чамбарчаслиги, икки томонлама муносабатларнинг ижобий динамикаси, икки давлат ўртасидаги дўстликнинг янада мустаҳкамланаётганини таъкидлаб ўтди. Абаевнинг айтишича, Ўзбекистон минтақада Туркманистон учун асосий иқтисодий ҳамкор ҳисобланади.

Қабул давомида Ўзбекистонда давлат ва жамият ҳаётининг турли соҳаларида амалга ошаётган ўзгаришларни намойиш қилувчи фотокўргазма ташкил этилди. Меҳмонларда ўзбек амалий санъати буюмлари катта қизиқиш уйғотди.