Ҳиндистоннинг Ҳайдаробод шаҳрида яшовчи йигит чекланган вақт ичида катта сондаги селфи олишни машқ қилиш учун ишидан бўшаб кетди. Бу ҳақда BuzzFeed сайти маълум қилмоқда.

Бхану Пракаш исмли йигит американча футбол ўйинчиси Патрик Петерсонга тегишли соатига 1449 марта селфига олиш бўйича рекордни янгилашга қарор қилди. Йигит 18 сентябрга қадар соатига 1800 та селфи олишга эришмоқчи. Айнан шу санага унинг жаҳон рекордини ўрнатиш расмий санаси белгиланган. Нашр ушбу рекордни қайси ташкилот қайд қилишини маълум қилмади.

Бугунги кунда Пракаш соатига 1700 та селфи олишга ўрганиб олди. У ўз қўлларини машқ қилдирмоқда ҳамда селфи учун штативни узоқ давомида ушлаб туришни машқ қилмоқда.

Пракаш 2015 йилнинг августида смартфонга ўз суратини олишга қизиқиб қолгунга қадар фармацевтика соҳасини ўрганиб, шаҳар шифохонасида илмий ходим бўлиб ишлаган.
“Мен кўчада кетаётганимда қандайдир болалар актёр Дуэйн Жонсоннинг 3 дақиқа давомида 105 та селфи олган рекордини муҳокама қилишаётган эди. Уйга келгач мен жаҳон рекордлари қандай ўрнатилишини аниқлашга тушиб кетдим”, деб эсламоқда ҳиндистонлик йигит.