Россия ва Тожикистон президентлари Владимир Путин ҳамда Эмомали Раҳмон 14 сентябрь куни бўлиб ўтадиган шахсий суҳбат жараёнида республикадаги вазиятни барқарорлаштириш билан боғлиқ масалаларни муҳокама қилишади. Россия етакчиси ёрдамчиси Юрий Ушаковнинг маълум қилишича, Москва Душанбега у ёки бу ёрдамни кўрсатиш ва сиёсий жиҳатдан қўллаб-қувватлашга тайёр.

Кремль вакили журналистларни Путиннинг Тожикистон пойтахтига коллектив хавфсизлик тўғрисидаги шартнома ташкилоти саммитига ташрифидан хабардор қилди. 14 сентябрь куни Путин ва Раҳмон учрашуви режалаштирилган.

“Ўйлайманки, мазкур масала (кўмак кўрсатиш) суҳбат жараёнидаги асосий мавзулардан бўлади. Табиийки, Раҳмон содир бўлган ҳодисалар ва республика раҳбарияти томонидан вазиятни барқарорлаштириш бўйича амалга оширилган чоралар тўғрисида маълумот беради”, – деди Ушаков. У Тожикистондаги ҳамкасбларининг маълумотига кўра, у ерда “ҳаммаси сокин” эканини қўшимча қилди.

8 сентябрь куни Тожикистон бош прокурори собиқ мудофаа вазири ўринбосари генерал-майор Абдухалим Назарзода ва полковник Жунайдулло Умаровга нисбатан жиноий иш очди. Улар терроризм, давлат тузимини ўзгартириш, экстремистик тузилмалар ташкил этиш ва қўпорувчиликда айбланмоқда.

Эслатиб ўтамиз, 4 сентябрь куни Душанбе ва пойтахтга туташ Ваҳдат туманида милиция бўлинмаларига уюштирилган ҳужумлар натижасида 4 нафар милиция ходими ва 4 ОМОН жангчиси ҳалок бўлган эди.