Россияда қурилиши бошланган тез нейтронларда ишловчи энг қувватли, кўп мақсадли тадқиқот ядровий реактори (МБИР) келажак дунё атом энергетикаси учун зарур бўлган ёқилғи ва конструкцион материалларнинг янги турларини ишлаб чиқиш муддатларини қисқартириш имконини беради, деб айтди “Росатом” давлат корпорацияси бош директори ўринбосари Вячеслав Першуков. 

“Бундай қурилмалар ҳали бўлмаган. Бу реактор келажак дунё атом энергетикаси учун мўлжалланган. У янги материал ва ёқилғилар тадқиқоти муддатларини бир неча бор қисқартиришга имкон беради”, деб айтди 11 сентябрда МБИР реактори бош биноси пойдеворига асос солиш тадбирида Першуков.

Першуковнинг таъкидлашича, реакторнинг қуввати қанча катта бўлса, натижаларни шунча тез олиш мумкин. “Агар ҳозирда мавжуд бўлган кам қувватли реакторлардан фойдаланиладиган бўлса, тадқиқотларга ўнлаб йиллар кетиб қолади. МБИР реактори бу муддатни 3-4 баробарга қисқартиришга имкон беради”, деб таъкидламоқда Першуков.

Першуковнинг айтишича, янги реактор негизида Халқаро тадқиқотлар маркази қуриш режалаштирилмоқда.

МБИР дунёда ҳозирда мавжуд, қурилаётган ва лойиҳаланаётган тадқиқот реакторларидан энг қувватлиси бўлади. Натрий иссиқлик ташувчи реакторнинг иссиқлик қуввати 150 МВт ни ташкил қилади. МБИРнинг ноёб техник характеристикалари янги рақобатбардош ва хавфсиз ядровий энергетик қурилмаларни, жумладан ядровий ёқилғи циклини туташтириш учун тез нейтронларда ишловчи реакторларни яратишни асослашда кенг спектрдаги тадқиқот вазифаларини ҳал қилишга имкон беради.