Россия давлатларни ядро қуролларини ўз ҳудудидан ташқарига жойлаштирмасликка чақириб, бу оммавий қирғин қуроллари тарқалиб кетишини назорат қилишга ёрдам беради, деб ҳисоблайди. Бу ҳақда жума, 11 сентябрь куни Россия Федерациясининг БМТдаги доимий вакили Владимир Сафронков Ядровий қуролларнинг синалишига қарши ҳаракат қилиш халқаро куни муносабати билан ташкил этилган Бош ассамблеясининг норасмий йиғилишида маълум қилди.

Унинг сўзларига кўра, Россия ядровий қуролсизланишнинг ашаддий тарафдори бўлиб, мазкур соҳада АҚШ билан икки томонлама шартномалар имзолаган.

“Биз мазкур масала юзасидан амалий мулоқотга тайёрмиз, бироқ бундай мулоқот, айнан амалий суҳбат фақатгина давлатлар ўз хавфсизлигини бошқа мамлакатлар хавфсизлиги ҳисобига таъминлашдан воз кечган тақдирда самара келтириши мумкин. Ҳозирча вазият тескарисини кўрсатиб турибди ва дунё сиёсат майдонида шу билан боғлиқ салбий омиллар тўпланиши содир бўлмоқда”, – деди дипломат.

Унинг айтишича, “бугунги муҳим учрашувда муҳокама қилинаётганларни ҳал этиш юзасидан халқаро босимни кучайтириш айрим мамлакатларнинг ядро қуролларини ўз миллий ҳудудига жойлаштириб, хориждаги инфратузилмаларни тугатиш ва бузиб ташланишига ёрдам берарди”.

Россия Федерациясининг БМТдаги доимий вакили Россия сўнгги 20 йил ичида тактик ядровий қуроллар омборини тўрт баробарга қисқартирганини айтиб ўтди. “Стратегик ҳужумкор қуроллар ҳажми эса 5 баробарга камайди. Россиянинг барча тактик ядро қуроллари миллий ҳудудлар чегарасида жойлашган бўлиб, мамлакатнинг юқори даражали хавфсизлигини таъминлайди”, – деди Сафронков.