«Рубин» бош мураббий Ринат Билялетдинов билан шартномани бекор қилди

Спорт 11 Сентябрь 2015 1072

Россиянинг «Рубин» клуби Бош директори Ильгиз Фахриев жамоа бош мураббийи Ринат Билялетдинов билан шартнома бекор қилинганини маълум қилди. Бу ҳақда қозонликлар расмий сайти хабар тарқатган.

«Бош мураббий билан тузилган шартнома томонларнинг ўзаро келишуви билан бекор қилинди. Ҳозир у Қозонда эмас. Бош мураббий ёрдамчиси Евгений Бондаренко ёшлар жамоаси мураббийлигига ўтказилди. Клубда бошқа ўзгаришлар бўлгани йўқ», - дея Фахриевнинг сўзларидан иқтибос келтиради «Рубин» матбуот хизмати.

Унинг сўзларига кўра, жамоани вақтинчалик бош мураббий сифатида Валерий Чалий бошқариб туради. Унга Дмитрий Кузнецов ёрдамлашади.

«Рубин» ҳозирда ўтказилган етти тур натижаларига кўра уч очко жамғарган ҳолда, турнир жадвалининг 15-ўрнини эгаллаб турибди.

Ринат Билялетдинов 2014 йилнинг январидан бошлаб қозонликларни бошқариб келган. Аввалига лицензияси йўқлиги учун катта мураббий сифатида қайдномадан ўтган бўлса, 2015 йилнинг 13 февралидан бош мураббий сифатида рўйхатга олинганди.

Кўпроқ янгиликлар