Ўзбекистон Президенти Ислом Каримовнинг 2015 йил 30 июлдаги фармойишига мувофиқ жорий йилнинг 15-16 октябрь кунлари Тошкентда XI Ўзбекистон халқаро пахта ярмаркаси бўлиб ўтади. Бу ҳақда ЎзА хабар берган.

Мазкур ярмарка Пахта бўйича халқаро маслаҳат қўмитаси (ICAC)нинг энг муҳим тадбирлари реестрига киритилгани боис дунё миқёсида пахта бозори сиёсатини белгиловчи нуфузли анжуманлардан бирига айланди.

«Ўзпахтасаноат» уюшмаси тизимида ҳам ушбу нуфузли форумга қизғин ҳозирлик кўрилмоқда. Жумладан, ярмарка иштирокчиларини Тошкент вилояти Юқори Чирчиқ туманидаги «Ўзбекистон пахта тозалаш» очиқ акциядорлик жамиятида кутиб олиш режалаштирилмоқда. Бу билан иштирокчиларни пахтани қайта ишлаш жараёнига татбиқ этилаётган замонавий янги технологиялар билан яқиндан таништириш, мутахассислар билан бевосита фикр алмашишига имкон яратиш назарда тутилган. Корхонага замонавий қуритиш, саралаш, жилдлаш, ленталаш ускуналари ўрнатилгач, иш унумдорлиги бир неча баробар ортди, сарфланадиган электр энергия миқдори анча камайди.

«Ўзэкспомарказ»да уюшма учун ажратилган майдонда соҳа корхоналарининг ишлаш жараёнини тўлиқ таърифловчи – қайта ишланаётган пахта маҳсулотларидан намуналар ва ишчилар учун яратилган шарт-шароитлар намойиш этилади.