11 сентябрь куни IEG UZBEKISTAN кўргазмалар компанияси томонидан UzEnergyExpo-Энергетика ҳамда UzStroyExpo-Қурилиш халқаро кўргазмаларининг очилишига доир матбуот анжумани ташкил этилди.

«Ўзэкспомарказ» МКК АЖ 1-павильонида бўлиб ўтадиган мазкур халқаро саноат кўргазмаларида бу йил Беларусь, Германия, Италия, Эрон, Хитой, Россия, Туркия, Ўзбекистон, Украина, Жанубий Кореядан 60 дан зиёд компаниялар иштирок этади.

UzEnergyExpo-2015. Энергетика. Энергияни тежаш. Ёритиш. Электротехника X- Халқаро кўргазмасида ташриф буюрувчилар эътиборига электр энергетикаси соҳаси учун энг замонавий ускуналар, технологиялар ва хизматларнинг тўлиқ кўлами тақдим қилинади.

Кўргазмада халқаро ва маҳаллий энергетика компаниялари; электр энергияси ускуналари, технологиялар ва хизматларнинг халқаро ишлаб чиқарувчилари ва етказиб берувчилари; энергетика объектларида сервис хизмат кўрсатишни тақдим қилувчи корхоналар; инжиниринг ва консалтинг компаниялари иштирок этади.

UzStroyExpo-2015. Қурилиш. Иситиш. Вентиляция. Қувурлар ва фитинглар V-Халқаро кўргазмаси қурилиш саноатида ҳозирги иқтисодий вазият билан боғланган мутлақо ўзгача мавқеини касб этади.

Жорий йилнинг январь-июнь ойларида Ўзбекистоннинг қурилиш материаллари саноати корхоналари томонидан 2,11 трлн. сўмлик маҳсулот ишлаб чиқарилган бўлиб, бу кўрсаткич 2014 йилнинг январь-июнь ойларига нисбатан 11,3 фоизга кўпдир.

Ўзбекистон Давлат статистика қўмитасининг хабар беришича, тармоқнинг республика саноат ишлаб чиқариш умумий ҳажмидаги солиштирма улуши 5,2 фоизни ташкил қилади.

Олдинги йилнинг шу даврига нисбатан республиканинг йирик корхоналари томонидан қуйидаги маҳсулот турларини ишлаб чиқариш ошган: шағал (+8,6 фоизга), қум (+9,8 фоизга), портландцемент (+12,6 фоизга), мармар, травертин, алебастр ва улардан буюмлар (+33,5 фоизга).

Шу билан бирга, гипс (+7,7 фоизга), оҳак (+34,9 фоизга), бетон (2,8 марта), қурилиш қотишмалари ва аралашмалари (3,6 марта) ишлаб чиқарилиши ошган. Юқорида санаб ўтилган қурилиш материаллари билан бирга ўтга чидамли бўлмаган том ёпиш черепицаси (+5,6 фоизга), ўтга чидамли бўлмаган керамик қурилиш ғиштлар (+15,9 фоизга), толали цементдан ишланган буюмлар (+17,7 фоизга), алюминдан ишланган эшик, дераза ва ромлар (+55,5 фоизга) ишлаб чиқарилиши ҳам кўпайган.

Бу йили UzStroyExpo кўргазмаси ишлаб чиқарилаётган маҳсулот бўйича иштирокчиларнинг кенг таркибига эга.