Полиция Россия пойтахти Москва шаҳри шарқида деразадан туриб ов милтиғида ўқ отган эркак кишини қўлга олди. ТАСС хабарига кўра, отишмадан жабр кўрганлар йўқ.

Қайд этилишича, Москва вақти билан 22:00 (Тошкент вақти билан 23:00)да номаълум шахс ўз уйи деразасидан ов милтиғида ўқ узган. Ҳодиса жойига етиб келган полиция ходимлари қонунбузарни қўлга олиб, текшириш учун полиция бўлимига олиб келган.
Пойтахт ҳуқуқ-тартибот органидаги ахборот манбасининг сўзларига кўра, эркак киши қўлга олиниш вақтида алькогол ёки гиёҳванд модда таъсирида бўлган.
Полиция матбуот хизмати эса ҳодисанинг рўй берганини тасдиқлаган, бироқ тафсилотлари тўғрисида тўхталмаган.

Эслатиб ўтамиз, бу каби ҳодисалар Россияда тез-тез содир бўлиб туради. Жумладан, 2015 йилнинг апрел ойида Москва вилоятининг Махаловка посёлкасида маст эркак ўз уйидан ўткинчиларга қарата ўқ отиб, бир кишини жароҳатлаган эди.