АҚШнинг Нью-Йорк шаҳрда якунига етиб бораётган “Катта Дубулға” туркумига кирувчи US Open турнирининг аёллар ўртасидаги баҳсларида финал иштирокчилари маълум бўлди. Эътиборлиси, илк бор ушбу мусобақанинг финалига бир йўла икки нафар италиялик теннисчилар етиб келишди.

Серена Уильямс ва Роберта Винчи ўртасидаги ярим финал учрашувида мезбонлар вакили кутилмаганда 6:2, 4:6, 4:6 ҳисобларида мағлуб бўлди.

Бу билан Роберто рақибасини жорий йил ҳисобидан ўтказилган барча “Катта Дубулға” турнирлари бош мукофотини қўлга киритишдан маҳрум қилди. Шунингдек, Винчи Серенанинг 33та ўйиндан иборат ғалабали сериясига ҳам чек қўйди.

Ундан олдинроқ эса италиялик яна бир теннисчи Флавия Пеннетта руминиялик Симона Халепни 6:1 ва 6:3 ҳисобларида енгиб финалга чиққанди.

Маълумот учун, 31 август куни бошланган АҚШ очиқ чемионати 13 сентябрь куни якунланади. Турнирнинг мукофот жамғармаси 42 253 400 долларни ташкил этади. Баҳслар хард кортларда ўтказилмоқда.