Ўзбекистон Ахборот технологиялари ва коммуникацияларини ривожлантириш вазирлигида 11 сентябрь куни Япониянинг NEC корпорацияси президенти Нобухиро Эндо бошчилигидаги делегация билан учрашув бўлиб ўтди. Бу ҳақда вазирлик ахборот хизмати хабар берган.

Учрашув давомида телекоммуникация ва ахборот технологиялари соҳасида ўрнатилган икки томонлама ҳамкорлик ҳолати хусусида фикр-мулоҳазалар билдирилди. Хусусан, ер усти рақамли телесигналларни узатиш юзасидан амалга оширилаётган лойиҳаларга оид истиқболли режалар муҳокама қилинди.

Учрашувда истиқболда ўзаро ҳамкорликни янги босқичга кўтариш, телекоммуникация ва ахборот технологиялари соҳасида малакали мутахассислар тайёрлаш бўйича Тошкент ахборот технологиялари университети ва бошқа таълим муассасалари билан алоқаларни йўлга қўйишга келишиб олинди.

Шунингдек, NEC корпорацияси делегацияси Тошкент ахборот технологиялари университетида ҳамда «Ўзбектелеком» АКнинг Телекоммуникация ва персонални ривожлантириш марказида бўлиб, уларнинг фаолияти билан яқиндан танишди.