Японияда юз берган кучли сув тошқинидан энг кўп талофат кўрган Дзёсо шаҳри атрофларида бедарак кетган 16 кишини қидириш ишлари олиб борилмоқда.

Хабар қилинишича, бу ҳудудда 3 кишининг сув тошқинлари қурбонига айлангани тасдиқланган.

Шаҳардан 5 минг нафарга яқин киши эвакуация қилинган. Дзёсо шаҳрида 10 сентябрь куни илк сув тошқинлари кузатилганди. Шундан буён ҳудудда ёмғирлар давом этмоқда.

Япониянинг яна бир шаҳри Осака ҳам сув тошқинларига учраган.

Япония метеорология бошқармаси маълумотларига кўра, мамлакатнинг марказий ва шимоли-шарқий ҳудудларига 8 сентябрдан бери 600 мм ёмғир ёққан. Сув тошқинлари "Этау" тўфонидан кейин бошланган.

12 сентябрь куни Япония бош вазири Синдзо Абэ Дзёсода эвакуация қилинганлар учун ташкил этилган лагерга ташриф буюрди.

Бундан олдинроқ, Япониядаги сув тошқинлари Toyota компаниясининг 3та заводида иш тўхтаб қолгани хабар қилинганди.