Шанба куни Сербия орқали Венгрия ҳудудига 4 минг нафардан ортиқ муҳожирлар ўтди ва бу борадаги рекорд даража қайд этилди.

Бу воқеа Венгрияда давлат чегараларини бутунлай ёпиб қўйишга бўлган чақириқлар кучайган вақтда содир бўлди.

Маълумотларга кўра, айни вақтда Сербия ва Венгрия чегарасида Яққин Шарқдан келган 175 минг муҳожир жойлашган. Чегарада эни 4 метр бўлган тўсиқлар ўрнатилган. 15 сентябрь куни Венгрияда мамлакат ҳудудига ноқонуний равишда кирганлик учун жазо чоралари кучайтирилиши кутилмоқда.

Эслатиб ўтамиз, Венгрия бош вазири Виктор Орбан Bild газетасига берган интервьюсида Европага келаётган муҳожирлар оқими Яқин Шарқдаги уруш ҳаракатлари эмас, балки яхшироқ ҳаёт излаш билан боғлиқлигини айтган ва уларга келган жойларига қайтиб кетишни тавсия қилганди.

Шунингдек, Венгрия бош вазири миграция натижасида насронийлар мағлуб бўлишидан огоҳлантирган.