Шотландия ҳукумати раҳбари Никола Стержен мамлакатда яна бир марта мустақиллик референдуми ўтказилиши кераклигини айтди.

"Бизнинг манифестимизда навбатдаги референдумни ўтказиш учун асослар кўрсатилади. Биз бундай манифестни тақдим этамиз", дейди Шотландия миллий партияси етакчиси Стержен.

Бу ташаббусга қарши бўлган томон эса Стерженнинг тарафдорларини "Бир авлод учун бир референдум" қоидасини бузишда айблаб чиққан.

Миллий партия бундай манифестни 2016 йилда тақдим этишни мўлжаллаган.

Стерженнинг қўшимча қилишича, иккинчи референдум 5 ёки 10 йилдан кейин бўлса ҳам ўтказилади ва шотландлар мустақилликка эришиш бўйича қарорларини қабул қилишади.

Эслатиб ўтамиз, бундан олдинги референдумда, 2014 йилда овоз берувчиларнинг нисбатан кўпчилик қисми (55 фоиз) Буюк Британия қироллиги таркибида қолишни ёқлашганди.

Ipsos Mori агентлиги ўтказган сўровномага кўра эса, айни вақтда шотландиялик сайловчиларнинг 55 фоизлик қисми мустақиллик тарафдорлари ҳисобланишади.