Сурхондарё вилоятининг Сариосиё туманида истиқомат қилувчи Бердиевлар оиласи “Адолат кўзгуси” газетасига мурожаат қилиб, уйга муҳтожликлари боис бюджетдан ташқари пенсия жамғармасининг эски биносини доимий яшаш жойи сифатида олинишида амалий ёрдам кўрсатишни сўради. Айтилишича, оила бошлиғи Бердиев Алишер ва унинг рафиқаси Умида Ашуровалар 1-гуруҳ ногиронлари бўлиб, 3 нафар вояга етмаган болаларга эга. Бу борадаги туман ҳокимлигига юборилган мурожаатга тезда жавоб олинди.

Туман ҳокими Ҳ. Мингбоев аризанинг ўрганиб чиқилгани, шу асосда тегишли ёрдам кўрсатилганини маълум қилди. Жумладан, оила Кўзи ожизлар жамияти томонидан икки хонали уй билан таъминлангани, уларнинг болаларига эса нафақалар маҳалла фуқаролар йиғини томонидан узлуксиз бериб келинаётгани айтилди. Бундан ташқари, уй-жой қурилиши учун туман ҳокимлиги томонидан 2 800 кг цемент, 6 дона стропило, 40 дона шифер ва 7 минг дона ғишт берилган.