Франциянинг пойтахти Париждан 20 км узоқликда жойлашган Карьер-сюр-Сен шаҳарчасида ўғрилар хитойлик аёл саёҳатчилар автобусдан тушаётган пайтларида уларнинг сумкаларини олиб қўймоқчи бўлишди. Бўлаётган воқеага экскурсиячи аралашишга қарор қилди. Шундан кейин ўғрилар ўз эътиборларини аёллардан унга қаратишди ҳамда уни талашга тушиб кетишди. Оқибатда 32 ёшли гид ўзининг 20 минг евро, 5 минг швейцар франки (4,5 минг евро) пули ва эндигина сотиб олган Rolex соатидан (нархи 5 минг евро) айрилиб қолди. Ўғрилар пул ва соатни олгач, автомобилда воқеа жойидан ғойиб бўлишди, деб хабар бермоқда The Local нашри.

Айни пайтда ушбу воқеа юзасидан тергов ишлари олиб борилмоқда. Бундан ташқари, полициячилар бу жиноят билан Версаль туманида тез-тез рўй бераётган жиноятлар ўртасида алоқа борлигини ўрнатишга ҳаракат қилмоқдалар.

Нашрнинг таъкидлашича, охирги вақтларда Францияга келаётган хитойлик аёл сайёҳларнинг сони анча ошган. Хитойлик саёҳатчилар ўз олдиларида катта пул олиб юришлари кўпинча уларнинг ўғрилар нишонига айланишларига сабаб бўлмоқда. Пекин хитойлик саёҳатчиларни тунаш ҳолатлари кўпайиб кетганидан хавотир билдирганидан кейин Франция ҳукумати Хитойдан келган сайёҳлик гуруҳларини қўриқлаш бўйича чораларни кучайтирган.