2015 йилнинг бошидан буён 53 минг нафардан ортиқ афғонистонлик муҳожирлар Покистондан ортга қайтиб кетди. Бу ҳақда Покистоннинг Пешовар шаҳридаги БМТнинг қочқинлар масалалари бўйича бошқармаси комиссариати берган маълумотга асосланиб Афғонистондаги Pajhwok агентлиги хабар тарқатган.

"Биздаги маълумотларга қараганда, Покистонга вақтинчалик жойлашган 53 минг нафардан ортиқ афғонистонлик ватанига қайтиб кетди", дейди БМТ вакили.

Маълум қилинишича, Покистонда ҳозирда ҳам 3 млн атрофида афғонистонлик яшайди ва уларнинг аксар қисми ноқонуний муҳожирлар ҳисобланади.

2014 йилнинг 16 декабрь кунида Пешавор шаҳридаги мактабга жангарилар томонидан ҳужум уюштирилиши ва 150 киши (шундан 135 нафари мактаб ўқувчилари) ҳалок бўлишидан кейин ҳукумат ноқонуний муҳожирларга нисбатан қаттиққўл сиёсат юрита бошлади. Покистон бундай муҳожирларни жангарилар сифатида айблаб чиқди.

Охирги ой давомида бу мамлакатнинг турли туманларида ўтказилган рейдлар давомида афғонистонлик муҳожирларга босим ўтказилиши кучайди. Шунингдек, маҳаллий аҳоли ҳам афғонларга душманларча муносабатда бўлмоқда.