2015 йилнинг 14 сентябрь куни Ўзбекистон Республикаси ташқи ишлар вазири Абдулазиз Комилов юртимизга ташриф буюрган Бельгия Қироллиги парламенти Вакиллар палатаси раиси Зигфрид Браке билан учрашди. Бу ҳақда Ўзбекистон ТИВ матбуот хизмати хабар берган.

Суҳбат давомида Ўзбекистон-Бельгия муносабатларининг ҳозирги ҳолати муҳокама қилинди ва икки давлат парламентлари ўртасидаги алоқаларни фаоллаштириш истиқболлари юзасидан фикр алмашилди.

Учрашувда Ўзбекистон ва Бельгиянинг қонунчилик ҳокимиятлари даражасидаги делегацияларининг мунтазам учрашувлари алоқаларни сиёсий, савдо-иқтисодий, гуманитар соҳаларда янада мустаҳкамлаш ҳамда ҳамкорликнинг шартнома-ҳуқуқий негизини такоммиллаштириш имконини яратиши таъкидланди.

Бельгия Парламентининг қуйи палатаси раисининг мазкур ташрифи ҳамда Олий Мажлис Қонунчилик палатаси ва Сенати, Ўзбекистон Ҳукумати ва қатор вазирликлар раҳбарлари билан бўлаётган музокаралар икки томонлама ҳамкорликни янада чуқурлаштириш ва унга серқирра тус беришга ўзаро қизиқиш ошаётганини тасдиқлайди.

Учрашувда халқаро ва минтақавий муаммоларни ўз ичига олган бошқа масалалар ҳам кўриб чиқилди.