Бугун Ўзбекистонда ахборот-коммуникацион технологиялар ҳафталиги очилди. Бу мамлакатда ахборот соҳасидаги жорий йилнинг энг катта воқеаси бўлди.

Ҳафталик анъанавий тарзда Халқаро бизнес марказидаги матбуот анжуманидан бошланди. Унда ОАВ вакиллари тадбирлар дастури билан танишиш имкониятига эга бўлди.
Айтилишича, тадбир доирасида Intellect2All IT-лойиҳалар Республика конкурсининг ғолиблари эълон қилинади. Тадбир бугун, 14 сентябрь куни, Тошкентдаги ёшлар ижоди саройида бўлиб ўтади.

15 сентябрь куни “Ўзэкспомарказ”да ICTEXPO-2015 ахборот-коммуникацион технологиялар кўргазмаси очилади. Унда 150дан ортиқ компания ўз маҳсулотлари билан иштирок этади. Экспозиция 1 800 кв м майдонни қамраб олади.
Бундан ташқари, шу кунларда “Ўзэкспомарказ”да Gadjet Fair ахборот технологиялари ярмаркаси, шунингдек, UCG FIFA кибер-футбол бўйича Ўзбекистон чемпионати ўтказилади.

Кўргазма 17 сентябрга қадар давом этади. Ўша куни BestSoft Challenge дастурчилар танлови ғолибларини тақдирлаш маросими ўтказилади. Ҳар бир номинация бўйича энг яхши лойиҳа муаллифлари 10 млн сўмлик пул мукофотлари билан тақдирланади.
Ўша куни ICTForum-2015 бошланади. Бу ерда, шунингдек, eGovernment Uzbekistan, StartupMix, “Банклар учун инновацион кун”, “Ахборот хавфсизлиги” конференциялари ўтказилади.

Ҳафталик 18 сентябрь куни ICTSummit-2015 саммити билан якунланади. Бу соҳанинг энг йирик тадбири бўлиб, унда Ўзбекистон, Россия, Украина, Германия, Чехия, Япония, Корея, Беларусь, Эстония, Кипр ва Қозоғистон вакиллари иштирок этади.
Ҳафталикнинг айрим тадбирлари Самарқанд шаҳрида ҳам ўтказилади.