“ИШИД” террорчилик гуруҳи билан алоқадорликда гумон қилинган 4 нафар ҳинд БААдан депортация қилинди ва Ҳиндистон махсус хизматларига топширилди. Бу ҳақда India TV телеканали маълум қилди. 

Телеканал маълумотларига кўра, улар иккита рейс орқали уйларига жўнатилганлар. Гумонланувчилар бўлган самолётлар Ҳиндистоннинг жанубидаги Керала штатидаги Тривандрум ва Карипур аэропортларига етиб келган. Бу ерда уларни махсус хизмат ходимлари кутиб олган. Қайд этилишича, айни пайтда улар гумонланувчиларни сўроқ қилмоқдалар.

Бу Ҳиндистон фуқароларининг террорчилик фаолиятига алоқадорликда гумон қилиниб БААдан депортация қилинаётган иккинчи ҳолатдир. 11 сентябрда БАА махсус хизматлари “ИШИД” сафига жангариларни ёллаган ҳиндистонлик аёлни қўлга олиб, уни Дубайдан чиқариб юборган эдилар. Махсус хизмат ходимларининг маълумотларига кўра, Николь Жозеф тахаллуси остидаги аёл ижтимоий тармоқлар орқали одамларни “ИШИД” сафига ёллаган. Аёлни жиноят устида қўлга олишга муваффақ бўлинди. У турмуш ўртоғи ва уч нафар қизи билан ватанига жўнатиб юборилди. Аёлни ватанида тергов ва суд кутмоқда.
Ҳиндистон разведка бюроси маълумотларига кўра, “ИШИД” сафига 20 га яқин ҳинд кирган.