Фарғона шаҳрида янги бунёд этилган муҳташам спорт кошонаси – сув спорти саройи фойдаланишга топширилди. Бу ҳақда УзА хабар берган.

"Президентимизнинг 2011 йил 15 ноябрдаги “2012-2015 йилларда Фарғона шаҳрининг бош режасини амалга ошириш, ижтимоий ва транспорт-коммунал инфратузилмаси объектларини қуриш ва реконструкция қилиш чора-тадбирлари тўғрисида”ги қарори ижроси доирасида шаҳарда кенг кўламли бунёдкорлик ишлари амалга оширилмоқда. Замонавий корхоналар, таълим ва тиббиёт муассасалари, спорт мажмуалари ва стадионлар, йўллар, хиёбонлар барпо этилаётир", дейилади хабарда.

Фарғона шаҳрида бунёд этилган Сув спорти саройи “Қувасойтаъмирқурилиш” масъулияти чекланган жамияти бунёдкорлари томонидан қурилган.

14 миллиард 700 миллион сўмликдан ортиқ маблағ эвазига барпо этилган мазкур ёпиқ сузиш мажмуасида барча шароит яратилган. Сув ҳавзаси, машғулот ва тренажёр залларига эга ушбу мажмуада болалар сузиш, синхрон сузиш, сув полоси каби спорт турлари билан шуғулланади. Бир вақтнинг ўзида бу ерда 120 нафар ўғил-қиз шуғулланиши мумкин.