Коллектив хавфсизлик шартномаси ташкилоти мутахассислари ИШИДнинг Марказий Осиёдан жангарилар ёллашга мўлжалланган 57 минг сайти борлигини аниқлади. Бу ҳақда ташкилот бош котиби Николай Бордюжа баёнот берди.

“Коллектив хавфсизликка таҳдид солаётган жами 57 минг сайт аниқланди. Улардан 50 мингтасининг фаолияти тўхтатилди, айримлари бўйича тергов хатти-ҳаракатлари амалга оширилмоқда”, - деди у.
Шунингдек, бош котиб экстремистик йўналишдаги сайтлар сонининг кўпайиб бораётганидан хавотирда эканлигини билдирди.

Эслатиб ўтамиз, Тожикистон пойтахтида КХШТ давлатлари етакчиларининг саммити бўлиб ўтмоқда. Ушбу саммитнинг кейинги босқичида йиғилишга делегациялар ҳам қўшилади. Кенгашнинг бугунги сессияси бир қатор ҳужжатларнинг имзоланиши билан якунланади. Булар орасида энг муҳими давлат раҳбарларининг халқаро сиёсий майдондаги энг долзарб масалалар бўйича қўшма баёнотидир.

Таъкидланишича, ҳужжатда ташкилотга аъзо давлатларнинг жаҳон миқёсида авж олиб бораётган иқтисодий, сиёсий муаммолар, ҳарбий ихтилоф юзасидан хавотирлари баён этилади.
Саммит давомида КХШТнинг турли йўналишдаги ҳамкорликдаги фаолияти, жумладан, минтақавий ва глобал таҳдидлар, террорчилик ва экстремизмга қарши кураш сингари масалалар муҳокама қилинади.