Россия президенти Владимир Путин Россия ва Тожикистон ўртасидаги иттифоқчилик шартномалари доирасидаги ҳамкорлиги натижаларидан мамнунлигини баён қилди. Бу ҳақда у Тожикистон президенти Эмомали Раҳмон билан учрашув чоғида айтиб ўтди.

“Тожикистон ва Россия ўртасидаги муносабатлар иттифоқчилик мажбуриятлари асосида олиб борилмоқда. Биз барча халқаро ташкилотлар – БМТ, ОБСЕ, ШХТ доирасидаги барча ҳаракатларимизни ўзаро келишиб амалга оширишимизни мамнуният билан таъкидлаб ўтишим мумкин”, - таъкидлади у.

Эслатиб ўтамиз, Тожикистон пойтахтида КХШТ давлатлари етакчиларининг саммити бўлиб ўтмоқда. Ушбу саммитнинг кейинги босқичида йиғилишга делегациялар ҳам қўшилади. Кенгашнинг бугунги сессияси бир қатор ҳужжатларнинг имзоланиши билан якунланади. Булар орасида энг муҳими давлат раҳбарларининг халқаро сиёсий майдондаги энг долзарб масалалар бўйича қўшма баёнотидир.

Таъкидланишича, ҳужжатда ташкилотга аъзо давлатларнинг жаҳон миқёсида авж олиб бораётган иқтисодий, сиёсий муаммолар, ҳарбий ихтилоф юзасидан хавотирлари баён этилади.
Саммит давомида КХШТнинг турли йўналишдаги ҳамкорликдаги фаолияти, жумладан, минтақавий ва глобал таҳдидлар, террорчилик ва экстремизмга қарши кураш сингари масалалар муҳокама қилинади.