Россиянинг Биробижан шаҳридаги коллеж талабаси турар-жой кириш қисмида ётган бошпанасиз кишининг устидан бензин қуйиб, ёқиб юборди, дея хабар берди “Интерфакс” агентлиги.

Тергов хулосаларига кўра, 12 сентябрь тунида гумондор кўп хонадонли уйларнинг биридаги кириш жойида тенгдошлари билан спиртли ичимликлар истеъмол қилган. У кириш жойидаги бошпанасизни бир неча бор кўчага қувиб юборган. Шундан сўнг талаба яқин-атрофдаги автомобилларга ёқилғи қуйиш шохобчасидан бензин сотиб олган ва уни бошпанасиз устидан қуйиб, ёқиб юборган.

Жабрланган танасининг 90 фоизи куйиши оқибатида ҳодиса жойида вафот этган. Ёш талаба қўлга олиниб, унга нисбатан қотиллик жинояти бўйича иш очилган.