Тожикистон бош прокуратураси мудофаа вазирининг собиқ ўринбосари Абдуҳалим Назарзоданинг 11 нафар тарафдорига давлатга хиёнат қилиш, террорчилик, ноқонуний тарзда қурол-аслаҳа сақлаш ва бошқа бир қатор моддалар бўйича айблов қўйди. Бу ҳақда ТАСС ахборот агентлигига Тожикистон Ички ишлар вазирлиги маълум қилган.

“Аввалроқ 6 сентябрда жиноий гуруҳ раҳбари, исёнчи Абдуҳалим Назарзода ва унинг икки яқин шеригига нисбатан шундай айбловлар қўйилган эди”, деб таъкидлаб ўтди Ички ишлар вазирлиги вакили.

Унинг айтишича, яқин орада яна бир гуруҳ террорчиларга нисбатан айбловлар қўйилади.

Тожикистоннинг Ромит дарасида амалга оширилган аксилтеррорчилик операциясида 100 дан ортиқ террорчилар ва уларнинг шериклари қўлга олинган. Улардан 12 нафари ўз хоҳиши билан таслим бўлган, 22 террорчи тўқнашувлар давомида йўқ қилинган. Давлатга қарши бош кўтарган гуруҳ қолдиқларини йўқ қилиш бўйича операция ҳамон давом этмоқда.