Тошкент шаҳрида пропискадан ўтганига уч йил бўлган айрим фуқаролар шаҳар ҳудудидан уй сотиб ололмаётгани айтиб, оммавий ахборот воситаларига шикоят қилмоқда. Жумладан, 2012 йили пропискани расмийлаштирган фуқаролардан бири “Даракчи” нашрига шикоят хатини ёзиб, нотариал идоралар уй олди-сотдисини расмийлаштиришдан бош тортаётганини маълум қилди. Бу саволга ИИВ хорижга чиқиш, келиш ва фуқароликни расмийлаштириш бошқармаси бошлиғи Б. Шорихсиев жавоб берди.

“Ўзбекистон Республикаси Вазирлар Маҳкамасининг 2012 йил 16 февралдаги 41-сонли қарори билан тасдиқланган “Ўзбекистон Республикаси фуқароларини Тошкент шаҳри ва Тошкент вилоятида доимий прописка қилиш ва турган жойи бўйича ҳисобга олиш тартиби тўғрисида”ги Низом тасдиқланган эди, – деди у. – Бугунги кунда ИИВ томонидан норматив ҳуқуқий ҳужжатларга қўшимчалар киритилаётганлиги сабабли ушбу масала ўз ечимини топганидан сўнг, сиз туман ИИБ паспорт бўлимига мурожаат қилишингиз мумкин бўлади”.