АҚШ президенти Барак Обама маъмуриятининг ташқи сиёсати нафақат Европа давлатларини, балки АҚШнинг ўзини ҳам фалокатли оқибатларга олиб келди, деб ёзмоқда The Wall Street Journal нашри.

“Обама америкаликларга Суриядаги фуқаролик урушидан четда қолишга ваъда берган эди, бироқ Суриядаги уруш Америкадан четда қолмайди. Оқ уй энди Обама АҚШ 2016 йилда 10 минг суриялик қочқинни қабул қилишни истаётганини маълум қилди”, деб ёзмоқда нашр.

Нашрнинг тушунтиришича, бу миқдор АҚШ ҳудудида жойлаштирилган қочқинлар миқдоридан 6 марта кўпроқни ташкил қилади ва шу билан бирга йил охиригача янги қочқинларнинг келиши эҳтимоли мавжуд.

Мақола муаллифининг ёзишича, АҚШ ўн минглаб қочқинларни жойлаштиришни талаб қилишни бошлайдиган “қамал қилинган Европа” босимига учрайди.

“Америкаликлар ҳимматлидир ва АҚШ акс ҳолда ўлдирилишлари мумкин бўлган одамларни қабул қилишига шубҳа қилмаса ҳам бўлади. Бироқ “ИШИД” ва “Ал-Қоида” бошпана қидираётганлар орасида ўз агентларини ўтказишга ҳаракат қилишлари мумкин.  Бу учун эса айб Обама маъмурияти зиммасига тушади”, деб айтилмоқда нашрда.

Нашрнинг нуқтаи назарига кўра, буларнинг барчаси Обаманинг фалокатли ташқи сиёсатининг “аччиқ меваларидир” ҳамда “АҚШ жаҳон инқирозларидан ҳеч қандай оқибатларсиз кета олиши мумкинлиги ҳақидаги хомхаёллардир”.