Жаҳон банки ижрочи директорлар кенгаши Украинага мамлакат молия тизимини қўллаб-қувватлаш учун 500 млн доллар миқдорида кредит ажратиш тўғрисидаги қарорни қабул қилди. Бу ҳақда банк матбуот хизмати хабар берди.

“Украина барқарорлик ва иқтисодий ўсишга фақатгина ислоҳотларни давом эттириш йўлидаги ҳаракатини давом эттирган тақдирда қайтиши мумкин”, – дея қайд этди Жаҳон банкининг Беларусь, Молдавия ва Украина бўйича директори Чимяо Фан.

Унинг сўзларига кўра, кредит мамлакат молия тизимини барқарорлаштириш ва янада соғлом банк секторини ташкил этиш бўйича чора-тадбирларини қўллаб-қувватлаш мақсадларига хизмат қилади.

Таъкидланишича, украин ҳукумати иқтисодиётни ислоҳ қилиш борасида салмоқли одимларни ташлади ва Жаҳон банки барқарорликнинг дастлабки аломатларини кўрмоқда.